Bu yazı toplamda 390 ,bugün ise 1 kez okundu...

No ko, çend seriyo, bê veng o
Hêrs o to ra no ko!
Adırê xo, nêmısneno
Bejna azeban ra
Hene u kengerê neqeban ra hêrs o, no ko
Oxro ke no ko, ê to bi
No zımê, no usar, o veng, ê to bi
No zon, ê to bi
Zuran ra mexapiye
Rastiye est a, ru est o, inkar meke
Verde xo ra
Eke maneno dıme ra
Tayê mı ra hes bıke

-Oxro ke na heskerdene, ê to biye-

Cigera mı! No ko, xêli waxto bê veng o
Ne tija sodıri ra, ne to ra qesi nêkeno
Bêzar biyo, qefeliyo
Serê emrê xo ra dêmdiyo
Çımê to ke (şıkır) est ê
Berzke sarê xo, qayt bıke
Zonê to ke ( ax şıkır ke) est o
Lal mebe, qesi bıke
Eke to ra zamet niyo
Tayê mı ra hes bıke

-Oxro ke na hesrete, ê to biye-

Zeriya mı! No ko, xêli waxto bê veng o
Rayi, xeribiye ra derg benê, meso
Ez, tenyatiya xo, kemeran ra vıla kena seba to
Xêli waxto
Cigera mı! Xêli waxto, ez vengê xo
Ebe mirazê zonê to vıla kena
Araqê mı de, bê kamiye rışina
Tı, xo de duriya
Duritiye rışina

-Oxro ke no ko, emrê to bi-

Waştiya mı! No ko, xêli waxto bê veng o
Zonê xo de qesi bıke, no inkar bıheliyo
Lazım niyo,
Mı ra hes meke, hes meke!
Tı, ebe kamiya xo bena rındeke
Naye xo vira meke

İlhami Sertkaya
14-1-2010